Xəbərlər
Qadın dağçımız beynəlxalq dırmanışda Azərbaycanı təmsil edir
Qadın alpinistlərinin İranda Toçal zirvəsinə dostluq yüksəlişi başlayıb. Azərbaycanı bu yüksəlişdə Sima Səfərova təmsil edir.
Novruz bayramı münasibətilə İqtisadi Əməkdaşlıq Təşkilatına (İƏT) üzv ölkələrin qadın alpinistlərinin İranda Toçal zirvəsinə dostluq yüksəlişi başlayıb. Azərbaycanı bu yüksəlişdə qadın alpinistimiz Sima Səfərova təmsil edir.
Onun verdiyi məlumata görə, İran İslam Respublikasından olan xanım Rəşin Cahanbazi başda olmaqla İƏT ölkələrindən olan qadın alpinistlər Novruz bayramının ilk günlərində (21-23 mart 2022-ci il) İran İslam Respublikasında yerləşən “Toçal” zirvəsinə qalxırlar. “Toçal Telekabin”in İctimaiyyətlə əlaqələr şöbəsindən verilən məlumata görə, bu tarixi yüksəliş dostluq şüarı altında İƏT Mədəniyyət İnstitutu, Parsian Turizm Holdinq, Azadi Beynəlxalq Turizm Mədəniyyəti (AITO) və Tochal Telecabin tərəfindən təşkil olunub.
Verilən xəbərə görə, Novruzun üçüncü günü (23 mart) İran rəsmiləri, xarici diplomatlar, yerli və xarici jurnalistlərin iştirakı ilə “Dostluq yüksəlişi” komandasının şərəfinə mərasim keçiriləcək. Tədbir zamanı 3600 metr hündürlükdə “Dostluq yüksəlişi” memorial abidəsinin açılışı olacaq.
