Bakıda yeni park açılıb

Şəhərə gələn turistlərin ən çox sevdiyi və gəzdiyi yerlər arasında parklar da var.

Belə parklardan daha biri Bakının Xətai rayonu ərazisində yaradılıb. Avqustun 26-da Azərbaycan Respublikasının Prezidenti İlham Əliyev və birinci xanım Mehriban Əliyeva Bakının Xətai rayonu ərazisində yeni yaradılan “Gənclik” parkının açılışında iştirak ediblər.

Bir zamanlar baxımsız ərazi olan bu yerin indi həmin görkəmindən əsər əlamət qalmayıb. Paytaxtın Xətai rayonunda yerləşən ərazi yenidən qurularaq Azərbaycanın meşə tipli füsunkar parklarından birinə çevrilib.

Hələ 2019-cu il noyabrın 11-də “Gənclik” parkı yeni salınarkən Heydər Əliyev Fondunun “Regional İnkişaf” İctimai Birliyinin “Təbiət naminə birləş, Həyat naminə birləş!” layihəsi çərçivəsində ağacəkmə aksiyasında iştirak edən dövlətimizin başçısı parkın abadlaşdırılması, təbii mənzərəsinin qorunub saxlanılması, burada əyləncə və idmanla məşğul olmaq üçün şəraitin yaradılması ilə yanaşı, iaşə obyektlərinin qurulması, insanların asudə vaxtlarının səmərəli təşkili məqsədilə zəruri infrastrukturun qurulmasına dair tapşırıqlar vermişdi. Üzərindən qısa zaman keçməsinə baxmayaraq, tapşırıqlar tam şəkildə icra olunub və nəticədə yeni istirahət mərkəzi paytaxtın ən gözəl məkanlarından birinə çevrilib.

Parkda şəhər sakinlərinin və qonaqların istirahəti üçün müxtəlif infrastruktur yaradılıb. Buraya üz tutanlar həm yay, həm də qış aylarında paytaxt Bakının, o cümlədən Xəzər dənizinin əsrarəngiz mənzərəsini də seyr edə bilərlər.

Gənclik parkı 43 hektar ərazini əhatə edir. Burada 300 minədək ağac əkilib, yaşıllıqlar salınıb. Bir sözlə, sakinlər və qonaqlar parkda asudə vaxtlarını səmərəli keçirə biləcəklər.

Uşaqlar, böyüklər həm də fiziki məhdudiyyətli şəxslər üçün üçün idman və əyləncə sahələri yaradılıb. Bağlı və açıq futbol meydançaları inşa olunub. Qaçış üçün cığırlar, eləcə də velosiped yolları var. Parkdan Bakının, o cümlədən Xəzər dənizinin mənzərəsini seyr etmək mümkündür. Bakıda meşə tipli ilk park bu ilin əvvəlində Yasamal rayonu ərazisində yaradılıb.