Fəridə Cəbrayılzadə

Doğum tarixi: 15 mart, 1991
Vəfat tarixi: 26 dekabr, 2017
Təhsili: Azərbaycan İctimai-Siyasi Universiteti

Fəridə Cəbrayılzadə öz bioqrafiyasında yazırdı “ən çox sevdiyim məşğuliyyət uşaqlarla məşğul olmaq, onlarla birgə vaxt keçirmək, onların şəxsi inkişafında yardımçı olmaqdır”. Bəli, uşaqların sevimli dostu hətta onların gözündə sehrli bir mələk idi. Qısa müddətə onların həyatına daxil olub sehrli əsasıyla hər yanı parlaq və işıqlı etdi. Bəlkə də tək uşaqlar üçün deyil, ailəsi, dostları üçün də belə idi. Fəridənin çox təəssüf ki, 2017-ci il 26 dekabrda Quba rayonunun Xınalıq kəndindən Tufandağ istiqamətində Babur Hüseynov və Namin Bünyadzadə ilə birlikdə itkin düşdüyü xəbəri hamını sarsıtdı. Uzun axtarışlardan sonra gələn məlumatlar daha kədərli idi. Bu kədər hələ də onu tanıyan hər kəs üçün çox üzücüdür. Amma Fəridənin sağlığında gördüyü işlər yada düşəndə, onu tanımağın xoşbəxtliyi bizi sevindirir.

Fəridə Cəbrayılzadə 1991-ci il 15 martda Masallı şəhərində anadan olub. 2008-ci ildə orta məktəbi Masallıda bitirib, sonra ali məktəbə daxil olub. İctimai-siyasi universitetin Beynəlxalq Münasibətlər (Şərq ölkələri) fakültəsini bitirib. Onun hələ Universitet dönəmindən başlayan aktiv ictimai fəaliyyəti artıq diqqət çəkirdi. Bir neçə layihədə könüllülük fəaliyyəti ilə yanaşı, o, internat evinə gedir, uşaqların qayğısına qalır, onlara maddi-mənəvi dəstək olmağa çalışırdı. Universitetdən sonra o, daimi xüsusi qayğıya ehtiyacı olan, daun və autizm sindromlu uşaqlarla vaxt keçirirdi.

Dünyasını dəyişməzdən əvvəl, 2017-ci ildə isə Afrikaya səyahət etmiş və səyahəti boyu fotolar çəkmişdi. Fəridə Cəbrayılın fotoları sadəcə həvəskar, səyahətçi fotoları deyil. Bu təsvirlərin ümumi kontekstinə baxanda hamısının içindən sarı sim kimi keçən ümumi xətti sezə bilərik: insan və təbiət. Bu işıqlı, rəngarəng təsvirlər, həmçinin, onun həyata baxışını əks etdirir.

Fəridənin ən böyük arzusu çəkdiyi fotolardan ibarət sərgisinin keçirilməsi idi. “VarYox” 15 Mart 2019-cu il tarixində dostu Şahin Yaqubzadə ilə əməkdaşlıq edərək Fəridənin anım tədbirini keçirmiş və onun fotolarının satışını təşkil etmişdi.

Fəridə Azərbaycan zirvələrini fəth etmək arzusundaydı. Bu arzusu, onu əbədi olaraq bu yüksəkliklərin sakini etdi.