Bakılı aktrisa rus komediya yol filmində rol alıb

Həmyerlimiz, populyar teatr və kino aktrisası, Vaxtanqov adına Akademik Teatrın (Moskva) aparıcı aktrisalarından biri Olqa Lerman “Yola düşən” (Поехавшая) adlı komediya janrında olan yol filmində çəkilişlərə başlayıb.

Filmin çəkilişləri Nijni Novqorod şəhərində aparılır.

“Çəkilişlərin ilk günlərindən sonra enerjim və ilhamım artır. Mən hər gün yeni şeylər öyrənirəm. Bu, mənim üçün böyük hədiyyədir”, – filmdə baş rolu oynayacaq Olqa Lerman deyib.

“Yola düşən” filmi qeyri-adi bir qərar verən qız, Anya haqqında ruhlandırıcı hekayədir – o, öz taksa cinsi iti ilə Rusiyada velosiped turuna çıxır. Və bütün bunlar özünü, azadlığını və sevgini tapmaq üçündür. Ancaq Anya peşəkar idmançı olmadığına görə, onu gözləyən təhlükələrə hazır deyil. O, bunu yolda dərk edəcək…

Olqa Lerman 1988-ci il martın 25-də Viktoriya Lermanın (Səməd Vurğun adına Azərbaycan Dövlət Akademik Rus Dram Teatrının quruluşçu rejissoru) və bu teatrın aktyoru, Əməkdar artist Fuad Osmanovun ailəsində anadan olub. Olqa uşaqlıqdan bəri məşqlərdə iştirak edir, uşaq tamaşalarında teatrın səhnəsində görünür. O, balerina olmaq arzusunda idi. 7 yaşına kimi bədii gimnastika ilə məşğul olur, məktəbi bitirdikdən sonra isə Bakı Xoreoqrafiya Məktəbinə daxil olub. Daha sonra Krasnodar Xoreoqrafiya Məktəbinin xalq rəqsləri şöbəsini bitirib.

Olqa 18 yaşında Moskvaya köçüb. 2006-2011-ci illərdə B.V. Şukin adına Ali Teatr Məktəbində təhsil alıb. Üçüncü kursdan başlayaraq, o, artıq Moskva Akademik Satira Teatrında rol alırdı. 2013-cü ildə Olqa Lerman Rimas Tuminasın “Yevgeni Onegin” tamaşasında Tatyana Larina rolunu alıb. Ümumilikdə dörd Moskva teatrının səhnəsində 15-dən çox tamaşada rol oynayıb. Aktrisa bir sıra teatr mükafatlarına layiq görülüb. O, 2009-cu ildə “Bridge Party” filmində debüt etdi. Bugünədək 30-a yaxın filmdə rol alıb.

Mənbə: Trend