Nepalda təkbaşına trekkinq etmək qadağan edilir

Nepalda təkbaşına yürüşlər dövrü başa çatır. Aprelin 1-dən fərdi turistlər ölkə daxilində yalnız bələdçi ilə səyahət edə bilərlər. Lakin bu yeni qanunda bəzi istisnalar var.

Belə bir tədbirin söz-söhbəti illərdir ki, dolaşır. 2012-ci ildə bir neçə bölgədə əcnəbilərə qarşı hücumlar Nepalın qadağanı elan etməsinə səbəb oldu. Daha sonra səlahiyyətlilər bunu dayandırdılar.

Nəhayət, bu yaz qayda qüvvəyə minir. Nepal 2012-ci ildə olduğu kimi eyni təhlükəsizlik problemlərini qeyd edir.

Nepal Səyahət Agentlikləri Assosiasiyasının prezidenti Nilhari Bastola The Kathmandu Post-a açıqlamasında “Hər il 10-15 trekker itkin düşür və bu ciddi rəqəmlərdir” – deyib.

Nepal Turizm Şurasının direktoru Maniraj Lamihane The Hindustani Times-a deyib: “Bu qərar turistlərin xeyrinədir. Tək səyahətlərdə piyadalar tez-tez azırlar və qeyri-müəyyənliklə üzləşə bilərlər. Bunu azaltmaq üçün təkbaşına gəzintiləri qadağan etmək qərarına gəldik”.

Bununla belə, yerli operatorlar bildiriblər ki, qadağa məşhur Everest bölgəsinə şamil edilmir.

Bu da maraqlıdır: Nepala gedən turistlərin Covid-19 sığortası olmalıdır

Everest qadağadan yayınır

Nepal Turizm Şurası, bələdçi müşayiət etmədikcə, fərdi səyahətçilər üçün TIMS* kartlarını verməyəcəklərini açıqlayıb. Lakin qruplara hələ də icazə verilir.

TIMS kartları

TIMS kartı Trekkerlərin İnformasiya İdarəetmə Sistemləri deməkdir və tələb olunan təhlükəsizlik qeydiyyatıdır. Nepalın Turizm Şurası tərəfindən verilir. Onu paytaxt Katmandudakı Turist Xidməti Mərkəzindən və Pokharadakı bir sıra yerlərdən əldə etmək olar.

Trekkerlər pasportlarının surətini, fotoşəkilləri və səyahət sığortasının sübutunu təqdim etməli, üstəlik qrup halında beynəlxalq trekkerlər üçün 1000 Nepal rupisi (təxminən 7 ABŞ dolları) rüsum ödəməlidirlər. İndiyədək solo trekkerlər hər marşrut üçün 2000 rupi ödəyirdilər.

Dawa Stephen qeyd edir ki, tək səyahətə qoyulan bu qadağa praktikada Everest ərazisinə şamil edilmir. Texniki olaraq siz Everest üçün TIMS kartı da almalısınız, lakin yerli bələdiyyə bundan bir neçə il əvvəl imtina etdi və öz haqqı ilə əvəz etdi. Bu pul birbaşa yolların və infrastrukturun saxlanmasına gedir. Beləliklə, Everesti tək gəzmək istəyən hər kəs üçün sadəcə Luklaya çatmaq, bələdiyyə haqqını orada ödəmək, sonra isə parkın girişində – milli parkın haqqını ödəmək kifayətdir.

Sagarmatha Milli Parkının gələcəkdə solo trekkerlərə məhdudiyyətlər tətbiq edib etməyəcəyi bəlli deyil.