Şamaxıda Quşçu palçıq vulkanı püskürüb

23 yanvar 2021-ci il tarixində saat 19:20 radələrində Şamaxı rayonunun inzibati ərazisində yerləşən Quşçu kəndindən 500-600 metr məsafədə Quşçu palçıq vulkanı püskürüb.

Püskürmə uğultulu səslərlə müşayiət olunub. Quşçu palçıq vulkanı 3 qrupdan ibarət olmaqla Şamaxı ərazisinin tez-tez püskürən aktiv palçıq vulkanlarından hesab olunur.

Ekologiya və Təbii Sərvətlər Nazirliyinin Bakı və Abşeron yarımadasının palçıq vulkanları qrupu Dövlət Təbiət Qoruğunun əməkdaşları Şamaxı rayonunun Quşçu kəndi ərazisində püskürən vulkanla bağlı müvafiq ölçmə işləri həyata keçirib.

Qoruğun direktoru Ceyhun Paşayev bu barədə açıqlama verib.

O qeyd edib ki, ərazidə bir neçə gün əvvəl seysmik aktivlik artdığına görə vulkan püskürməsi baş verib.

“Ərazidə baş verən bu dəfəki vulkan püskürməsi nadir hal hesab olunur. Sərt süxurlar olduğu üçün fərqli-fərqli hündürlüklər qeydə alınıb. Vulkan 3 hektar ərazini əhatə edib. Həcmi isə 27 min kub metrdir”.

Qoruğun direktorunun sözlərinə görə 1810-cu ildən bu günə qədər palçıq vulkanlarının püskürmə statistikasına əsasən bu Quşçu palçıq vulkanının 16-cı püskürməsidir.

Mənbə: Ekologiya və Təbii Sərvətlər Nazirliyi